Se nô sibi ba
cuma assim que kabalindadi passanta
na cabesa ku corçon di nô governatis,
ninguin cana larga ba tarsado
Se nô sibi ba
cuma és santchos rabidados
ku rostos di pacadur sin borgonha
é djunta mon cu djugudés faimadús
pa disgraça nô guiné
pa disgraça és povo letetido di cansera
ninguin cana larga ba tarsado
nô mininus ku ranhu pindradu
eh ta sardia caminhus sin sunhus
eh ta sardia caminhus sin sperança
eh ta distindi mon pa otcha pon
eh ta bindi kurpu pa otcha sustento
Es cansera que bô punu n´el
Um dia i na kaba
Povo disdja paz i felicidade
Povo disdja tarbadju i prosperidade
geba i tustumunho
de tudu lágrimas cu darmado disna de 73
geba ku si udjus di futcero i sibi tudo
i ta tchora també ma i cata disquisi
fidjus de terra ku durbado na kabalindadi.
Bõ sukutano, mofinos pé rapadus
nô pertu tchiga
Ku tarsado ou ku lamparan
Nô na bim pa kaba ku bos
Nô na bim pa kaba
ku és cansera que bô punu n´el